A finalidade desta comunicación é analizar, dende a filosofía, os diferentes problemas que presentan as sociedades dixitais. A transformación dixital, que hoxe se formula en función da cuarta revolución industrial, supón unha sucesión de procesos de cambio que, ao impactar máis aló da dimensión económica e industrial, requiren un enfoque filosófico. A intelixencia artificial, por exemplo, é unha ferramenta de traballo moi potente con importantes consecuencias socioeconómicas, pero que –polo menos polo de agora– non cuestiona o papel da orixinalidade, a autonomía e a creatividade humana. As sociedades dixitais son superficies virtuais que requiren de conceptos filosóficos para evitar a hexemonía da posverdade: fronte ao expresionismo estético, a busca da xustificación e o ideal da universalidade. Algunhas posibilidades abertas polas últimas tecnoloxías predicen un mundo poboado de humanos mellorados. As interfaces cerebro-ordenador ou a semellanza dos cerebros cos ordenadores son algúns exemplos que requiren un enfoque filosófico para evitar consecuencias prexudiciais e identidades falsas. Por último, cabe preguntarse se a redución do mundo ao cálculo e á medida, é dicir, a redución do mundo á magnitude, impide diferentes formas de sentir, pensar e relacionarse.